शान्त तथा न्यायपूर्ण विश्व व्यवस्थाको सिर्जनामा बुद्ध उपदेश महत्वपूर्ण – राष्ट्रपति भण्डारी

ENGLISH

POLITICS

शान्त तथा न्यायपूर्ण विश्व व्यवस्थाको सिर्जनामा बुद्ध उपदेश महत्वपूर्ण – राष्ट्रपति भण्डारी

15 May, 2017 | Bhawana Pathak | 575 Views | comments

राष्ट्रपति विद्यादेवी भण्डारीले अहिंसा, सत्य, करुणा र सहिष्णुताजस्ता मानवीय गुणले ओतप्रोत बुद्धका शाश्वत् उपदेशले हाम्रा सभ्यतालाई दुई सहस्राब्दीभन्दा बढी समयदेखि मार्ग निर्देशित गर्दैआएको बताउनुभएको छ ।

बुद्धजयन्तीका अवसरमा श्रीलङ्काले आयोजना गरेकोे संयुक्त राष्ट्रसङ्घीय वैशाख सम्मेलनको समापन समारोहमा प्रमुख अतिथिका रुपमा आज साँझ श्रीलङ्काको दोस्रो ठूलो सहर क्यान्डीमा सम्बोधन गर्दै उहाँले भन्नुभयो – “बौद्ध दर्शनको गौरवमय इतिहास र उपलब्धि हाम्रो आस्था, संस्कृति, जनजीविका र जीवनप्रतिको दृष्टिकोणसँग अभिन्न रूपमा गाँसिएका छन् ।”

राष्ट्रपति विद्यादेवी भण्डारीले शान्त तथा न्यायपूर्ण विश्व व्यवस्थाको सिर्जना बुद्धको उपदेशका शाश्वत् सन्देशको पालनाप्रति हुने हाम्रो आस्थाको नवीकरण र समर्पणमा निर्भर गर्दछ भन्दै बुद्घ संसारकै ज्योति हुन् र संसारलाई हामी तथा भावी पुस्ताका निमित्त अनुपम आश्रयस्थलमा रुपान्तरण गर्न सो ज्योति मार्गदर्शक बन्ने हाम्रो विश्वास छ भन्नुभयो ।

“कुनै पनि समाजमा शान्ति, स्थायित्व र प्रगतिको आधार सामाजिक न्याय हो, समाजका प्रत्येक वर्ग र समुदाय समान अधिकारका हकदार भएमा सामाजिक न्याय सुनिश्चित हुन्छ,” उहाँले भन्नुभयो – “भेदभावको उन्मूलन, न्यायोचित सहभागिता र आर्थिक समृद्धिको प्राथमिकताका साथै गरिबी र पछौटेपन निवारण गर्नेतर्फ शासनव्यवस्था लक्षित हुनुपर्दछ ।”

राष्ट्रपति भण्डारीले हामीले विश्वमा असहिष्णुतामा आधारित विभिन्न प्रकारका अतिवाद र कट्टरवाद भोगिरहेका छौँ, धार्मिक, जातिगत र सभ्यतागत आधारमा विभाजन गर्न कोसिस भइरहेका छन् भन्दै स्थापित व्यवस्थाउपर गम्भीर चुनौती सिर्जना गर्न गैरराज्य तत्वहरू समेत उद्यत देखिन्छन्, यस्ता तत्वले हिंसा र अन्य विकल्पद्वारा अस्थिरता र अराजकता पैदा गरी सामाजिक बनावटलाई खल्बल्याउँदै विश्वशान्ति र समृद्धिउपर अवरोध पु¥याउँदै आएको बताउनुभयो ।

जुनसुकै आवरणमा भएपनि सामाजिक सद्भाव बिथोल्ने, मानवतामा विभाजन ल्याउने र सङ्कीर्णता, कट्टरता र घृणा फैलाउने मान्यताहरु आजको विश्वमा स्वीकार्य हुन सक्दैनन्, उहाँले भन्नुभयो – “धार्मिक सहिष्णुताको लामो इतिहास बोकेको मुलुक नेपाल विश्वमा चिरस्थायी शान्ति प्राप्तिका लागि अन्तरधार्मिक एवम् अन्तरसांस्कृतिक संवाद, समझदारी र सहयोगको आवश्यकताको पक्षमा छ ।”

राष्ट्रपति भण्डारीले दिगो शान्ति स्थापना तथा संस्थागत गर्नका लागि सबै मुलुकले सामञ्जस्यपूर्ण तवरले विभिन्न सभ्यताबीच सद्भाव, आपसी सम्मान, शान्तिको संस्कृति र अहिंसा प्रवद्र्धन गर्ने आफ्नो दायित्व दृढताका साथ पूरा गर्नुपर्नेमा जोड दिँदै सांस्कृतिक, भाषिक, जातीय वा धार्मिक विविधता कुनै पनि समाजका लागि बोझ होइन, सम्पदा र गौरवको विषय बन्नुपर्दछ भन्नुभयो ।

विश्वको सर्वोच्च शिखर सगरमाथाको देश नेपाल र आफ्नो पुरानो इतिहासका दौरान लामो सामुद्रिक मार्गमार्फत विभिन्न सभ्यतासँग अन्तक्र्रिया गर्ने हिन्द महासागरको विलक्षण मोतीसमान रहेको श्रीलङ्काका बीच शताब्दीऔँदेखि सुमधुर सम्बन्ध रहिआएको छ भन्दै उहाँले यातायात र सञ्चार सञ्जालको विस्तारमार्फत यस सम्बन्धलाई थप सुदृढ तुल्याउनु आवश्यक छ भन्नुभयो ।

राष्ट्रपति भण्डारीले मित्रता र सहयोगको हाम्रो द्विपक्षीय सम्बन्ध सामाजिक, सांस्कृतिक र धार्मिक निकटताबाट अभिप्रेरित रहेको उल्लेख गर्दै साठी वर्ष अघिमात्र औपचारिक कूटनीतिक सम्बन्ध स्थापित गरिएपनि हाम्रो सम्बन्ध शताब्दीयौँदेखि अक्षुण्ण रहेको छ, नेपालका विलक्षण विभूति गौतम बुद्धको दर्शन र सन्देशहरु हाम्रा दुई मुलुक र जनताका बीच सम्बन्ध स्थापनाका निमित्त आधारका रुपमा रहेका छन् भन्नुभयो ।

हालका वर्षमा उच्चस्तरीय भ्रमणको आदानप्रदान, विभिन्न क्षेत्रमा सहयोग र सार्क तथा बिमस्टेकजस्ता क्षेत्रीय मञ्चहरुमा दुवै मुलुकको सक्रिय सहभागिताले द्विपक्षीय सम्बन्ध मजबुत पार्न सघाएको बताउँदै उहाँले भन्नुभयो, “मैले भर्खरै श्रीलङ्काको दालडा मालिगावाको भ्रमण गरेँ, बुद्धद्वारा प्रतिपादित विश्वशान्ति, स्थायित्व र समृद्धिको प्रवद्र्धनमा समर्पित हाम्रा जनताका लागि बुद्धको पवित्र दन्त अवशेष रहेको यो मन्दिरका कारणले क्यान्डीले नेपालसँग आत्मीय सम्बन्ध राख्दछ ।”

राष्ट्रपति भण्डारीले भन्नुभयो, “नेपाल र श्रीलङ्का दुवैले हिंसात्मक द्वन्द्वको पीडादायी कालखण्ड र जनधनको ठूलो क्षतिपछि प्राप्त गरेको अमूल्य शिक्षा हो – शस्त्रबलभन्दा जनताको अभिमत शक्तिशाली हुन्छ । यो कुरा विश्वको राजनीतिक इतिहासबाट राम्रोसँग सावित भइसकेको छ । विगतमा श्रीलङ्काले भोगेसरह लामो हिंसात्मक द्वन्द्व, अस्थिरता र सङ्क्रमणकाल चिर्दै नेपालले जननिर्वाचित संविधानसभाको माध्यमबाट असोज २०७२ मा संविधान प्राप्त गरेको छ ।”

नयाँ संविधानको प्रावधान मुताविक हाम्रो मुलुकमा आजकै दिन उत्साहवर्धक सहभागिताका साथ स्थानीय तहको निर्वाचनको मतदान प्रक्रियामा नेपाली जनता लामबद्ध भएको कुरा सुनाउन पाउँदा खुसी लागेको पनि राष्ट्रपति भण्डारीले बताउनुभयो ।

कार्यक्रममा श्रीलङ्काका राष्ट्रपति मैत्रीपाला सिरिसेनाले बुद्धका उपदेश र सन्देश परमसुख र शान्तितर्फ उन्मुख जीवनपद्धतिका द्योतक हुन् भन्दै बुद्धका उपदेशहरुको आत्मसात र निष्ठापूर्ण पालना मानवमात्रका लागि शान्तिपूर्ण विश्व स्थापना गर्न अधिक महत्वपूर्ण भएको बताउनुभयो ।

हाम्रा मूलभूत मानवीय मूल्य र साझा नियतिका दर्शनका रुपमा बौद्ध धर्मलाई हेर्नुपर्नेमा जोड दिँदै उहाँले समस्त मानवलाई एकताबद्ध गर्न शान्ति, अहिंसा, करुणा, सद्भाव र क्षमाकोे महत्व पहिलेभन्दा आज बढी रहेको छ भन्नुभयो ।

श्रीलङ्काको राजधानी कोलम्बोमा सुरु भएको सो तीनदिने सम्मेलनको समापन श्रीलङ्काको दोस्रो ठूलो सहर क्यान्डीमा भएको छ । गौतमबुद्धको जन्म, बुद्धत्व प्राप्ति र महापरिनिर्वाण मनाउन वैशाख दिवस आयोजना गरिन्छ । बुद्धका उपदेशको निरन्तर बढ्दो महत्वको मान्यतास्वरुप संयुक्त राष्ट्रसङ्घले सन् २००० देखि प्रत्येक वर्ष वैशाख दिवस मनाउँदै आएको छ ।

सामाजिक न्याय तथा दिगो विश्व शान्तिका लागि बुद्धको सन्देश भन्ने मूल नारासहित सुरु भएको सो सम्मेलनमा श्रीलङ्कासहित विश्वका ८५ मुलुकका ७५० बौद्ध धर्मावलम्बीको सहभागिता रहेको थियो । प्रमुखरुपमा बुद्ध धर्मको परिपे्रक्ष्यमा सामाजिक तथा प्राकृतिक न्याय, मानवताको रक्षाका लागि अन्तरधार्मिक साझा सहमति, आर्थिक तथा सांस्कृतिक पर्यटनको प्रवद्र्धनका लागि बुद्धिष्ट फोरम र अन्तर्राष्ट्रिय बुद्धिष्ट मिडिया सञ्जाल शीर्षकमा सो सम्मेलन केन्द्रित रहेको थियो ।

राष्ट्रपति भण्डारी सम्मेलनस्थलमा पुग्दा श्रीलङ्काका राष्ट्रपति मैत्रीपाला सिरिसेनालगायत त्यहाँका मन्त्री, उच्च पदस्थ सरकारी अधिकारी, बौद्ध धर्मका अनुयायी र स्थानीयले भव्य स्वागत गरेका थिए ।

तपाईले न्युज एनआरएन डट कमको ' एन्ड्रोईड एप्स ' डाउनलोड गर्नसक्नु हुनेछ | हामी सामाजिक संजाल फेसबुक ट्वीटरमा पनि छौं |

प्रतिकृया

LATEST NEWS

बैतडीको पाटनमा धानखेती

बैतडीको पाटनमा धानखेती

समयमै वर्षा भएकाले किसानले बैतडीको पाटनमा लगाएको धान खेती...

मृत्यु

वैदेशिक रोजगारमा मृत्यु हुनेको संख्या बढ्यो

वैदेशिक रोजगार प्रवद्र्धन बोर्डले अघिल्लो आवको तुलनामा गत वैदेशिक...

प्रा डा केसीको माग सरकारले सम्बोधन गर्नुपर्छ : सिटौला

नेपाली काँग्रेसका नेता कृष्णप्रसाद सिटौलाले प्रा डा गोविन्द केसीले...

एनआरएनए युरोपीय क्षेत्रीय बैठक तथा क्षेत्रीय महिला बैठक जुलाई २९ र ३० मा

“युरोपीय एनआरएनको प्रतिबद्धता : नेपालमा पर्यटक, ज्ञानसिप र लगानी”...

MOST POPULAR

सन्दीप लामिछाने

दिल्लीले सन्दीपलाई खेलाउन हैन सोसल साइटबाट व्यापार गर्न खोज्दैछ (भिडियो सहित)

विश्वभरका क्रिकेटप्रेमीहरुका लागि आकर्षक प्रतियोगिताका रुपमा रहेको इण्डियन प्रिमियर...

सन्दीप

दोस्रो खेलमा पनि सन्दीपले लिए विकेट : खेलको स्टाइलिस खेलाडी चुनिए(भिडियो सहित)

नेपाली क्रिकेटका लेग स्पिनर सन्दीप लामिछानेले दोस्रो खेलमा पनि...

सोनिका रोकायाको ‘आगो आगो ‘ बजारमा

सोनिका रोकायाको अभिनयमा पछिल्लो समय एक पछि अर्को सुपर...

bus-from-kathmandu-to-dhaka

ढाकाबाट काठमाडौंका लागि छुटे दुई बस

ढाका: बंगलादेशको राजधानी ढाकाबाट काठमाडौंका लागि दुई यात्रु बस...

पर्यटनमन्त्री अधिकारीको पहिलो निर्णय : निजगढ अन्तर्राष्ट्रिय विमानस्थललाई तीव्रता दिइने

राष्ट्रिय गौरवको आयोजना बहुप्रतिक्षित निजगढ दोस्रो अन्तराष्ट्रिय विमानस्थल निर्माणले...

फिल्म ‘यात्रा : अ म्युजिकल भ्लग’ को छायांकन सुरु

फिल्म ‘यात्रा : अ म्युजिकल भ्लग’ को छायाँकन सुरु...

FACEBOOK