‘छक्का पञ्जा-३’ ले अमेरिकामा बनायो नयाँ रेकर्ड

11 November, 2018 | Sandeep Bhattarai | 2580 Views | comments

यति बेला नेपाली सिने नगरीमा चलचित्र ‘छक्का पञ्जा-३’ ले एक पछि अर्को रेकर्ड बनाउदै गैरहेको छ । देश भित्र मात्र नभई विदेशमा पनि चलचित्र छक्का पन्जा ३ को माग ठगी नसक्ने गरि बढेको छ ।

नेपाली चलचित्रको सबै भन्दा ठूलो विदेशी बजार भनेर चिनिएको संयुक्त राज्य अमेरिकामा छक्का पञ्जा-३ ले अपेक्षा गरे भन्दा बढीको व्यापार गरिरहेको छ। अमेरिकामा यस अघि रिलिज भएका छक्का पन्जा, ‘छक्का पञ्जा-२’ र ‘लूट २’ को ३ हप्ता सम्म चलेको रेकर्ड रहेको थियो भने अब यो रेकर्डलाई ‘छक्का पञ्जा-३’ ले तोडिदिएको छ । नेपालीहरुको बाक्लो बसोबास हुँदै गरेको अमेरिकाको डालस टेक्सासमा अहिले छक्का पञ्जा-३ ले विदेशी भूमिमा लगातार १ महिना चल्ने पहिलो नेपाली चलचित्र बनी नयाँ रेकर्ड बनाएको छ ।

चलचित्रले हाल सम्म डालसमा मात्रै ६४ शो को सफल प्रदर्शन गरिसकेको छ भने अझै प्रदर्शन भैरहने जानकारी डालसका लागि अधिकारिक वितरक नेप्सिने र प्लानेट थ्री फिल्मस् ले जनाएको छ । डालसका लागि आधिकारिक वितरक एवं गत वर्ष ग्लोबल नेपाली फिल्म अवार्डमा उत्कृष्ट डाइसपोरा वितरकको अवार्ड हात पार्न सफल कम्पनी नेप्सिनेका सीइओ रायन रेज भन्नु हुन्छ – चलचित्र ‘छक्का पन्जा -३’ को सफलताले हामी नेपाली चलचित्र प्रदर्शकलाई नयाँ हौशला मिलेको छ र निकट भबिष्यमा यसले नेपाली चलचित्रको विदेशी बजारमा दिर्घकालीन प्रभाव पार्ने छ।

यो रेकर्डसंगै अब भने नेपाली चलचित्रले देश भित्र मात्र नभई विदेशी भूमिमा समेत प्रभाव बढाएको छ । दिपाश्री निरौलाद्वारा निर्देशित चलचित्र ‘छक्का पञ्जा-३’ मा दिपक राज गिरी, केदार घिमिरे, दिपिका प्रसाई, जितु नेपाल, निर शाह, बुद्धि तामांग लगायतका कलाकारको अभिनय रहेको छ । चलचित्र ‘छक्का पञ्जा-३’ लाई अमेरिकामा फ्युजन इन्टरनेशनल, प्लानेट थ्री फिल्मस् र कोशेली इभेन्ट्स म्यानेजमेन्ट कम्पनीले अधिकारिक रुपमा बितरण गरेका हुन् ।